Alaaftrap
Kómmende zaoterdig is ’t èntjeliks zo wiet: de Alaaftrap mit de officiële oetruiping van de Jubileium Sjtadsprins van Zitterd! Mer dat is neit alles, want taeves wurt dan de nuje sjlager van Zitterd gekaoze, en veer zeen greutsj te melje dat twee van de finaliste actief zeen in ós eige buurt.
Jan Janssen deit mit, mit zien aansjtaekelik nummer “Eine Daag Neit Gelache”, en Dette & Maurice zeen van de pertie mit ’t opgewekte “Plök De Daag”. Alletwee de leidjes sjtraole ein richtige Zittesje Sfeer oet, en veer kènne natuurlik neit keize tösje dees toppesj!
Veer roupe daoróm alle lede op óm te sjtömme op ein van dees twee kanjers via Radio Nónnevot. Laot eur sjtöm heure en sjteun ós buurtgenote in de sjtried óm ’t bèste vastelaovesleid! Daonaeve haope veer uch allemaole te zeen kómmende zaoterdig op de Mert van Zitterd. Want same viere is ummer leuker!
Hie ónger deile veer de links nao allebei de leidjes zodat geer nog effe kènt geneite en uch kènt veurbereie:
🎵 Eine Daag Neit Gelache – Jan Janssen
🎵 Plök De Daag – Dette & Maurice
Pès zaoterdig en alaaf!
‘t Besjtuur
